Бен Афлек нема профил на Инстаграм, а за тоа постои прилично необична причина. Како што откри во разговор за „Варајети“ (Variety), Инстаграм дури двапати му го блокирал профилот бидејќи платформата се сомневала дека лажно се претставува како – Бен Афлек.
За разлика од него, неговите поранешни сопруги се многу активни на социјалните мрежи. Џенифер Гарнер, со која има три деца, на Инстаграм ја следат 17,2 милиони луѓе, додека Џенифер Лопез, од која се разведе во 2024 година, има дури 239 милиони следбеници, пишува „Венити Фер“ (Vanity Fair).
Зборувајќи за притисокот што социјалните мрежи им го создаваат на младите актери, Афлек призна дека тој во улога на инфлуенсер воопшто не би се снашол. „Би бил ужасен инфлуенсер. Младите актери чувствуваат огромен притисок дека мора да собираат следбеници на социјалните мрежи. Јас во тоа не би бил добар“, рече тој.
Тој откри и дека неговите обиди за користење на Инстаграм не поминале баш најдобро. „Двапати ми го блокираа профилот на Инстаграм бидејќи мислеа дека лажно се претставувам како јас“, раскажа актерот.
Притоа немал намера да ги промовира своите филмови ниту да гради публика на социјалните мрежи. Инстаграм примарно му служел за да може да следи што објавуваат неговите деца. „Тоа ми беше само изговор за да ги гледам профилите на моите деца. Имав шест следбеници. Тоа беа моите деца и неколку нивни пријатели“, откри тој.
Глумецот проговори и за секојдневието и призна дека неговиот приватен живот не е ни приближно толку возбудлив колку што некои би очекувале.
„Во мојот живот нема ништо скандалозно ниту претерано интересно. Работам многу, а потоа одам по децата на училиште. Вечераме заедно ако сакаат да се дружат со мене. Една недела се кај мене, а една недела кај мајка им“, раскажа Афлек.
Ја пофали и својата поранешна сопруга Џенифер Гарнер, со која има три деца. „Прекрасно им е со мајка им, на што сум ѝ многу, многу благодарен. Знам дека ќе има и тешки моменти и не сакам ништо да заречам, но овој период од мојот живот навистина е прекрасен“, рече тој.
Афлек се осврна и на Џенифер Лопез, од која се разведе во 2024 година. На прашањето зошто нејзината актерска работа не добила повеќе признанија и награди, тој не криеше колку ги цени нејзините способности. „Исклучително го почитувам тоа што го работи и се восхитувам на нејзините способности“, рече тој.
Додаде дека успехот на кино-благајните и признанијата од филмската индустрија не мора секогаш да се совпаѓаат. „Забележав дека комерцијалниот успех на некој филм не е секогаш во согласност со мојот личен вкус. Тоа е дел од оваа необична, субјективна работа во која луѓето имаат различни ставови“, објасни тој.
Иако на Инстаграм нема милиони следбеници како неговите поранешни сопруги, Афлек е и тоа како познат на интернет. Неговите фотографии на кои изгледа уморно, загрижено или незадоволно со години кружат по социјалните мрежи и стануваат популарни мемови.
Неговиот израз на лицето толку пати привлече внимание што Џенифер Лопез своевремено го бранеше на црвениот тепих на Златните глобуси. „Не мора да се грижите за Бен, верувајте ми. Добар е. Среќен е“, порача таа тогаш.
Самиот Афлек денес со задоволство се шегува на сметка на својата интернет-популарност. „Мора да имаш смисла за хумор и да знаеш да се шегуваш на сопствена сметка. Така јас станав мем на ’измачен човек‘, како што тоа го нарекува ќерка ми“, рече тој.
И покрај популарноста што ја ужива на интернет, Афлек не планира наскоро да стане активен на социјалните мрежи. Смета дека актерите треба да задржат одредена доза на таинственост и дека на публиката не мора да ѝ го откриваат секој детаљ од приватниот живот.
„Мислам дека Даниел Деј-Луис, Мерил Стрип, Вајола Дејвис и Дензел Вашингтон се брилијантни актери. Тоа што би видел што јаделе за ручек нема да ме наведе повеќе да ги ценам нивните филмови“, објасни тој. „Свесен сум дека звучам како некој што е стар и не е во тек со времето, но верувам дека како актер мора да задржиш одредена илузија“, заклучи Афлек.
