Актерите и писателите од Холивуд ќе ги здружат силите и заедно ќе отпочнат штрајк, откако студијата не успеаја да постигнат договор оваа недела со Здружението на актерите на екранот – Американската федерација на телевизиски и радио уметници (SAG-AFTRA). Ова е првпат двата синдиката да штрајкуваат истовремено од 1960 година, кога актерот – и иден претседател на САД – Роналд Реган ги предводеше протестите.
Меѓу 160.000-те членови на SAG-AFTRA има многу од најголемите светски ѕвезди. А-листерите на Холивуд, од Том Круз, Анџелина Џоли до Џони Деп, се членови на синдикатот. Ѕвездите како Мерил Стрип, Бен Стилер и Колин Фарел јавно изразија поддршка за штрајкот.
Зошто штрајкуваат?
Запирањето на целата индустрија следи по расправијата за платите и влијанието на вештачката интелигенција во филмските студија и услугите за стриминг.
Двата синдикати не успеаја да постигнат договор за поправедна поделба на профитот и зголемена заштита околу правата на вештачката интелигенција (ВИ).
Синдикатите се загрижени за договорите и нивното држење чекор со инфлацијата, дополнителните плаќања во ерата на стриминг и поставувањето заштита против употребата на вештачка интелигенција имитирајќи ја нивната работа на филмови и телевизиски емисии.
Според синдикатите овој протест не е за да обезбеди повеќе пари за големите ѕвезди, чии договори се значително повисоки од тие што синдикатите ги договараат, но нивната поддршка на останатите вработени во индустријата е знаителна, бидејќи го привлекува вниманието на јавноста.
Актерите на блокбастерот „Опенхајмер“ ја напуштија премиерата
Кристофер Нолан е еден од првите големи играчи во Холивуд кој се осврна на штрајкот, бидејќи тој започна за време на европската премиера на неговиот најнов филм „Опенхајмер“ во Лондон. Славниот режисер ја изрази својата поддршка за актерската екипа.
„Морам да ја признаам работата на нашата неверојатна актерска екипа, предводена од Силијан Марфи. Списокот е огромен – Роберт Дауни Џуниор, Мет Дејмон, Емили Блант, Флоренс Пју, Кенет Брана, Рами Малек и многу други“ рече Нолан.
„Ги видовте овде на црвениот тепих“, продолжи тој. „За жал, тие мораше да ја напуштат премиерата за тоа што е неизбежен штрајк, приклучувајќи се на еден од моите еснафи, Здружението на писатели, во борбата за правични плати за вработените членови на нивниот синдикат, и ние ги поддржуваме“ рече Нолан.
Блант изјави за Deadline на црвениот тепих дека таа и нејзините колеги актери ќе „заминат заедно како актерска екипа во единство со сите“ доколку се одлучи дека и актерите стапуваат во штрајк.
„Ако нашето раководство вели дека договорот не е фер, тогаш мораме да останеме цврсти додека не постигнеме договор кој е фер за вработените актери“, изјави Дејмон за Deadline на премиерата. „Тоа е разликата помеѓу тоа да се има здравствена заштита или не за многу актери и ние мораме да го направиме тоа што е исправно за нив“.
Како штрајкот ќе влијае на филмовите и емисиите?
Холивудските продукции веќе значително забавија со работата откако започна штрајкот на писателите на почетокот на мај. Сериите со готови сценарија, како што е „Господарот на прстените: Прстените на моќта“, можеа да продолжат со снимањето ова лето, иако немаше писатели на снимањето. Но, без актери, единствените продукции од САД што можат да продолжат се неколку сапунски серии – кои имаат поинаков договор – и реални шоуа и игри, пишува Al Jazeera.
Поради оваа причина, Фокс оваа недела го претстави есенскиот телевизиски распоред полн со серии и шоуа без сценарија како Кујнски кошмари и Лего мајстори.
Филмските изданија се помалку погодени поради долгото пауза помеѓу крајот на снимањето и почетокот на прикажувањето во кината. Но, колку подолго трае штрајкот, толку е поголемо влијанието и врз филмовите.
Големите холивудски студија веќе ги реконструираа календарите за објавување. На пример, Дизни неодамна отфрли неколку филмови за суперхерои на Марвел, ширејќи ги низ подолг временски период.
SAG-AFTRA сугерираше дека може да понуди откажувања за да ги изземе помалите, навистина независни филмови.
Дали ќе бидат засегнати продукциите и надвор од САД?
SAG-AFTRA е американски синдикат, со седиште во Лос Анџелес. Но, тоа не значи дека влијанието на штрајкот ќе биде ограничено само во границите на САД.
„Кога актерите од SAG-AFTRA работат на филм што се снима во Европа, или Австралија, или Азија, или каде било, тие ќе мора да престанат со работа“, рече адвокатот на забавната индустрија Џонатан Хендл.
Штрајкот, исто така, ги спречува членовите да промовираат телевизиски серии и филмови, што значи дека премиерите и важните есенски филмски фестивали како Венеција и Торонто ќе бидат погодени доколку штрајкот не престане.
Како што стојат работите, „на филмскиот фестивал во Венеција, ако се прикажува филм со актери од SAG-AFTRA, актерите не можат да учествуваат на промоцијата“, рече Хендл.
Колку долго ќе трае штрајкот?
Писателите веќе 11 недели се во штрајк. Но, историски, штрајковите во Холивуд варираат многу по должина – од неколку месеци до нешто повеќе од три часа.
„Тоа зависи од нив. Отворени сме да разговараме со нив вечерва“, рече претседателката на SAG-AFTRA, Фран Дрешер, на прес-конференцијата во четвртокот, мислејќи на студијата.
„Од нив зависи дали се подготвени да разговараат на нормален начин што го почитува она што го правиме“, рече таа.
Хендл предвиде дека штрајковите ќе траат барем до есен.
„Ова ќе се одолговлекува и нема лесно да се реши, бидејќи двете страни го гледаат ова како егзистенцијално“, рече тој.
„Има многу горчина меѓу писателите и студијата, и актерите и студијата“.
Кое е економското влијание?
Од сметководство до угостителство до транспорт, безброј бизниси се поврзани со забавната индустрија. Тоа го прави финансискиот ефект од штрајкот во Холивуд тешко да се пресмета, но е несомнено огромен.
„Пред 15 години, кога писателите штрајкуваа – тоа беше 100-дневен штрајк – и проценката беше нешто повеќе од 2 милијарди долари. Така што тоа се сведува на околу 20 милиони долари дневно“, рече Хендл.
Прилагодено за инфлацијата, тоа е близу 30 милиони долари дневно изгубени само во Калифорнија, рече тој.
„Верувајте ми, срцето ни крвари што моравме да ја донесеме оваа одлука. Но, не можеме да не го добиеме она што овие членови го заслужуваат, бидејќи тоа само ќе се влоши“, рече Дрешер.
„Овде ја исцртавме линијата во песокот и мора да се направи ова. Бевме принудени на тоа“.
