Македонскиот стрип беше претставен на мултимедијална патувачка изложба посветена на Балканот, поставена во Националната библиотека на Романија, во Букурешт. Стрипови на неколку генерации македонски автори: Љубомир Филиповски, Илија Јордановски, Миле Топуз, Драган Ташковски, Диме Иванов-Димано, Дарко Богданов и Александар Стеванов, се само дел од македонските стрипописци во чии неколку стотици стрип-табли ќе можат да уживаат романските вљубеници во деветтата уметност.
Стеванов, кој истовремено е и селектор на македонскиот дел од изложбата, изјави: „Најголемиот дел од македонските стрипови поставени во Букурешт се премиерно објавени во детското списание „Наш свет“, во српската ревија „Никад робом“, во првата македонска стрип-ревија „Макстрип“, а во поново време и како албумски изданија. Бидејќи се со историска тематика,од историските личности во нив се среќаваат Александар Македонски, Хацон, Пребонд, Св. Кирил и Методиј, Св. Климент Охридски, цар Самуил, војводата Ивец, цар Гаврил Радомир, Ѓорѓи Војтех, Карпош, Сирма војвода и гемиџиите, но и фикциски ликови сместени на историскиот фон. Еден таков лик, Самуиловиот едноок воин Никола, е избран за најемблематичен протагонист од македонските историски стрипови и како таков е отпечатен во реална величина“.
