Вештачката интелигенција носи голем потенцијал за понатамошен напредок на науката и човештвото, но експертите предупредуваат и на потенцијалните негативни последици од вештачката интелигенција.
Напредокот на вештачката интелигенција има прилично поларизирачки ефект врз општеството. Додека некои луѓе се ентузијасти за можностите што им ги даваат генеративните алатки за вештачка интелигенција и се радуваат на понатамошен напредок што би требало да ги олесни работата и животот, многумина не се толку оптимисти. Напротив, тие стравуваат дека натамошниот напредок на вештачката интелигенција, а особено потенцијалната општа вештачка интелигенција, негативно ќе влијае на иднината на човештвото.
Стравовите секако не се неосновани, а за нив предупредуваат некои од најголемите имиња во оваа област, меѓу кои, на пример, Сем Алтман, првиот човек на OpenAI, компанијата која го разви четботот ChatGPT. Според некои, вештачката интелигенција може да биде опасна како нуклеарната војна и глобалните пандемии, што доволно говори за потенцијалната опасност.
Експертот за вештачка интелигенција и професор на Кембриџ, Дејвид Кругер, зборуваше за Business Insider за најголемите стравови за вештачката интелигенција. Тој вели дека иако луѓето сакаат да видат конкретни сценарија кога станува збор за егзистенцијален ризик од вештачката интелигенција, во моментов е многу тешко да се укаже на нив со какво било ниво на сигурност. Она во што е сигурен е дека немаме доволно време да се подготвиме за сите потенцијални закани.
Business Insider во својата анализа се обидоа да ги објастнат трите најголеми потенцијални закани од вештачката интелигенција.
Губење на контролата – еден од најголемите стравови е дека вештачката интелигенција би можела да им избега од контрола на луѓето кои ја развиваат и да оди по својот пат на кој луѓето повеќе нема да можат да влијаат. Кругер особено ја нагласува опасноста вештачката интелигенција да се користи од армиите за развој на автономно оружје што ќе се користи во битки: Јасно е дека таквите системи можат да убијат многу луѓе, коментира тој. Тој верува дека во тотално воено сценарио, потпомогнато од вештачка интелигенција која е попаметна од луѓето, машините веројатно ќе излезат од контрола и може да се случи да ги убијат сите.
Масовната невработеност – губењето на работните места поради вештачката интелигенција е најреална, непосредна и можеби итна егзистенцијална закана, според Абхишек Гупта, основач на Институтот за вештачка интелигенција во Монтреал. Оваа технологија веќе влијае на состојбата на пазарот на трудот, а различните предвидувања велат дека ова е само почеток и дека стотици милиони работни места се загрозени. Во таков случај, Гупта се прашува што ќе прават луѓето и која ќе биде нивната цел.
Надежта е дека, како и со сите претходни револуции, ќе се отворат нови работни места со нови технологии, така што луѓето на крајот ќе можат да најдат нова работа и, барем кога станува збор за работата, нивната цел.
Пристрасност – ако вештачката интелигенција им помага на луѓето да донесуваат одлуки, тогаш пристрасноста може да биде голем ризик, коментираат експертите со кои разговараа новинарите на Инсајдер. Таквата пристрасност во одговорите може да создаде опасни стереотипи. Еден од проблемите е што вештачката интелигенција претежно се обучува на податоци од англиски јазик, што исклучува многу луѓе кои не комуницираат на тој јазик. Со тоа што вештачката интелигенција поретко се обучува на тие други јазици, има помалку податоци и повеќе можности за пристрасност.
Извор: B92
