Директорот на американското Федерално истражно биро (ФБИ), Каш Пател, во средината на октомври треба да отпатува во Русија, објави „Политико“, повикувајќи се на американски функционер и уште едно лице запознаено со плановите.
Според информациите, Пател ќе престојува во Москва и Санкт Петербург на 14 и 15 октомври, а домаќин на посетата најверојатно ќе биде руската Федерална служба за безбедност (ФСБ). Засега не е објавена официјална причина за неговото патување.
Посетата доаѓа во период на неуспешни обиди за посредување во мировните преговори меѓу Русија и Украина. Претходно, претставници на администрацијата на американскиот претседател Доналд Трамп, меѓу кои Стив Виткоф и Џаред Кушнер, одржаа средби со рускиот претседател Владимир Путин и други високи руски претставници, но и со украински функционери.
Според „Политико“, разговорите не донеле значителен напредок бидејќи Русија останала на своите максималистички барања, меѓу кои и отстапување територии во Донбас што сè уште се под контрола на Украина. Киев веднаш ги отфрли таквите барања.
Во меѓувреме, Украина продолжува со напади врз руски воени и енергетски цели. Командантот на украинските Сили за беспилотни системи, Роберт „Маѓар“ Бровди, соопшти дека во ноќта меѓу 19 и 20 јули биле погодени седум руски бродови од таканаречената „сенковита флота“, седум енергетски објекти на окупираниот Крим и други воени цели.
Посетата на директорот на ФБИ во Русија доаѓа во чувствителен момент за односите меѓу Вашингтон и Москва, додека дипломатските напори за прекин на војната во Украина сè уште не дадоа конкретен резултат.
