Жена од Арлингтон, Вирџинија, освои премија од 1.727.474 долари откако за време на пауза за ручек на работа решила да одигра онлајн лотариска игра на својот мобилен телефон. Таа избрала дигитална верзија на популарната игра „Монопол“, по што на екранот се појавила милионската сума која веднаш ја потврдиле официјалните претставници на државната лотарија.

Додека се одморала од работните обврски, жителката на Арлингтон го отворила сајтот на државната лотарија на Вирџинија и ја активирала играта „Monopoly Super Spin“. Наместо вообичаена кратка забава, ручекот се претворил во животен пресврт кога системот регистрирал добивка вредна повеќе од 1,7 милиони долари.

Среќната добитничка им раскажала на претставниците на лотаријата дека останала во тотален шок кога ја видела сумата. Таа изјавила дека ниту во сон не замислувала такво нешто и дека сè уште не може да поверува во исходот.

Веднаш по добивањето на известувањето за добивката, таа му се јавила на сопругот за да ја сподели веста. Сепак, неговата прва реакција била целосно неверување.

„Ме лажеш! Ме лажеш!“, ѝ повторувал тој преку телефон, сметајќи дека станува збор за некаква шега. Добитничката засега не открива какви планови има за парите, а според законите на Вирџинија, го искористила законското право нејзиниот идентитет да остане анонимен за јавноста.