Канскиот филмски фестивал е еден од најпрестижните и најгламурозните филмски фестивали во светот, каде најголемите ѕвезди се собираат на едно место. Овој фестивал е одлична можност за промоција на новите филмови и место каде што продуцентите се обидуваат да ги продадат своите филмови на дистрибутерите од целиот свет.

Кан е местото каде што многу режисери го стекнале својот легендарен статус и го стекнале светското внимание. Мартин Скорсезе ја освои Златната палма во 1976 година за „Таксист“, а оваа година се враќа со филмот „Убијци на цветната месечина“. Квентин Тарантино ја доби палмата за „Pulp Fiction“ во 1994 година, а оваа година се враќа на фестивалот да зборува за својот престоен, последен филм.

Сепак, првите денови од фестивалот ги одбележаа Џони Деп и Харисон Форд чиј филмови одлично беа примени од публиката и наградени со неколкуминутни аплаузи.

Џони Деп и Харисон Форд ги украдоа вниманието и симпатиите на публиката

Џони Деп беше со насолзени очи по топлото добредојде на неговиот филм на Канскиот филмски фестивал во вторникот. На видеото споделено на социјалните мрежи од Variety може да се види Деп трогнат за време на преку петминутните овации за неговиот филм „Jeanne du Barry“, во кој тој глуми како поранешниот крал на Франција, Луј XV. Ова е првиот филмски проект на актерот по судењето за клевета со неговата поранешна сопруга Амбер Херд минатото лето. Поротата ги прогласи за одговорни за клевета во нивните тужби еден против друг, но досуди значително поголема отштета на Деп.

На прес-конференцијата за филмот во Кан, Деп зборуваше за „апстрактните шепоти“ и рече дека „поголемиот дел од она што го читавте во последните четири или пет години… во однос на мене и мојот живот, она што сте го прочитале е фантастично напишана фикција“.

Сличен третман од публиката на Канскиот филмски фестивал добија и Харисон Форд и петтиот дел од серијалот за Индијана Џонс „Бројчаникот на судбината“. Филмот доби петминутен аплауз, но најголема поддршка доби токму Форд. Актерот пристигна на црвениот тепих со сопругата Калиста Флокхарт, а од официјалниот спикер беа најавени како „Индијана Џонс и Калиста Флокхарт“. Форд беше пречекан како вистинска филмска ѕвезда, со илјадници обожаватели кои го извикуваа неговото име, а публиката во Палатата стана да му посака добредојде кога влегуваше во театарот, пишува Variety.

Форд беше повикан на сцената од директорот на фестивалот во Кан, Тиери Фремо, за да добие изненадување Златна палма додека наеговите најголеми улоги – од „Војна на ѕвездите“ до „Бегалецот“ – се вртеа на екранот.

„Многу сум трогнат од ова“, рече Форд. „Тие велат дека кога ќе умреш, го гледаш твојот живот како трепка пред твоите очи, а јас само што го видов мојот живот пред моите очи. Голем дел од мојот живот, но не целиот мој живот. Мојот живот беше овозможен од мојата прекрасна сопруга, која ја поддржа мојата страст и моите соништа, и јас сум благодарен“.

Мода и гламур на црвениот тепих

Кан секогаш привлекува некои од најголемите ѕвезди од забавната индустрија, а таквите како Скарлет Јохансон, Ел Фенинг, Натали Портман, Кејт Бланшет и други се во градот и ги промовираат своите претстојни проекти.

Шоуто на црвениот тепих започна со големото отворање и премиерата на Jeanne du Barry, на која Ел Фанинг присуствуваше во извонредна тоалета на Александар Меквин. „Времето што го споделивме и уметноста на која бев сведок од [Сара Бартон] во студиото на Меквин во Лондон се спомен што ќе го негувам засекогаш“, рече Фанинг за британскиот Vogue, кој го опишува конечниот исход како „фустан од соништата“ и „уметничко дело.”

Втората вечер на филмскиот фестивал беше за големиот бел фустан, бидејќи Џема Чан и Виола Дејвис носеа фустани со боја на слонова коска за премиерата на „Чудовиште“, додека третата ноќ беше големата вечер на Фиби Волер-Бриџ за премиерата на Индијана Џонс.

Големи имиња и одлични филмови во борба за Златната палма

Сепак, освен модата, клучниот дел од фестивалот се филмовите, а оваа година неколку филмови водени од ѕвезди ќе се обидат да го искористат фестивалот за да добијат на популарност и гледаност низ целиот свет. Еден од нив е токму новото продолжение на Индијана Џонс, кое веројатно е последното појавување на Харисон Форд во неговата најкултната улога. Дали може да го надмине слабиот прием на последното продолжение, „Индијана Џонс и Кралството на кристалниот череп“ и замената на Џејмс Манголд наместо Стивен Спилберг како режисер на серијалот?

Режисерот Тод Хејнс, кој ја имаше премиерата на „ Керол“ во Кан, се враќа на фестивалот со „May December“, во кој глуми Џулијан Мур како наставничка чија скандалозна врска со поранешен ученик е осудена од филмска ѕвезда (Натали Портман) која се подготвува да ја игра учителката во филм. Други филмови со големи ѕвезди се „Новото момче“, во кој ја гледаме Кејт Бланшет како калуѓерка во нејзината прва улога по „Tár“ и „Firebrand“, со Џуд Ло како Хенри VIII и Алиша Викандер како неговата последна сопруга, Кетрин Пар.

А потоа, тука се „Градот Астероид“ и „Убијци на цветната месечина“, двете најочекувани премиери на фестивалот. Случувањето на првиот филм е камп во 1950-тите за младите опседнати со вселената, а во главните улоги на филмот на Вес Андерсон се појавуваат Џејсон Шварцман, Скарлет Јохансон и Тилда Свинтон, како и новиот регрут Том Хенкс, пишува „The New York Times“. Филмот на Скорсезе поддржан од Apple ги прикажува мистериозните убиства на племето Осаж во 1920-тите и ќе донесе ѕвезди како Леонардо ди Каприо и Роберт де Ниро на црвениот тепих.

Во последниве години, добитникот на престижната награда „Златна палма“ често после тоа ги освојувал и другите филмски награди, како што тоа го направија „Паразит“ и „Триаголник на тагата“. Режисерот на вториот филм, Рубен Остлунд, ќе претседава со овогодинешното натпреварувачко жири, група која ги вклучува Бри Ларсон и Пол Дано и тие ќе го изберат својот фаворит од авторски тешката постава која вклучува неколку поранешни добитници на палми.

Меѓу нив се Вим Вендерс, кој ја зеде палмата за „Париз, Тексас“ и се враќа со „Совршени денови“, за чистач на тоалет од Токио и Хироказу Коре-еда, чиј нов филм „Чудовиште“ е првиот филм што го снимил во Јапонија од неговиот добитник на палма „Крадци на продавници“. Ниту еден режисер никогаш не ја земал палмата три пати, иако Кен Лоуч би можел оваа година, ако неговата нова драма од работничката класа „Стариот даб“ се покаже исто толку призната како „Ветерот што го тресе јачменот“ и „Јас, Даниел Блејк“.

Фотографии: AFP/ Getty images