Изненадното слетување на директорот на ЦИА, Џон Ретклиф, во Москва отвори серија анализи во руските медиуми за причините зад ваквата вонредна мисија. Според пишувањата во рускиот печат, испраќањето на првиот човек на американското разузнавање покажува дека вообичаените дипломатски канали меѓу Вашингтон и Москва веќе не функционираат, поради што двете страни морале да посегнат по директен безбедносен контакт на највисоко ниво.
Ненадејното доаѓање на Ретклиф со воен транспортен авион C-17A претставува прва посета на директор на ЦИА на Русија по крајот на 2021 година. Како што пренесува дописникот на Би-би-си, Стив Розенберг, руските весници детално ги анализираат мотивите за ваквиот чекор.
Весникот „Независимаја газета“ оценува дека потегот не треба да се гледа ниту како најава за мир, ниту како сигнал за војна. Според весникот, ова е јасен показател дека стандардните дипломатски механизми се целосно блокирани. Во такви услови, двете сили морале да активираат „тешка артилерија“ за да воспостават директна комуникација.
Паралелно со ова, весникот „Комсомолскаја правда“ изнесува тези дека шефот на ЦИА пристигнал за лично да му пренесе директно предупредување на официјална Москва. Аналитичари за рускиот весник посочуваат дека за Ретклиф ова било итно и претходно непланирано патување.
Како можен повод за ваквата реакција се наведува неодамнешниот потег на руското Министерство за одбрана, кое објави листа на фабрики што произведуваат дронови за Киев. По таа објава, Владимир Путин на состанок во Генералштабот побарал изработка на неколку сценарија за одговор. Според проценките што ги пренесуваат руските медиуми, американските служби дознале за дел од тие планови, што го натерало Вашингтон веднаш да побара итни консултации на терен.
