Вкупно 1.696 пожари на отворено се регистрирани на територијата на државата во периодот од 1 јуни до 31 август годинава, соопшти директорот на Центарот за управување со кризи (ЦУК), Мухамед Али. Иако летната сезона заврши, надлежните служби предупредуваат дека опасноста од нови огнени стихии на теренот останува исклучително висока и во септември.
Според официјалниот извештај на ЦУК, од речиси 1.700 регистрирани пожари во изминатите три месеци, 69 биле шумски. Во преостанатите 1.627 случаи гореле сува трева, стрништа, нискостеблеста деградирана шума и депонии.
Директорот на ЦУК посочи дека институцијата континуирано ја следела состојбата и вршела координација со надлежните служби за заштита на населението и материјалните добра. Али упати апел до граѓаните да не палат оган на отворен простор, да не фрлаат отпушоци од цигари и запалив отпад во природата, а секое забележано чадење веднаш да го пријават на бројот 112.
Директорот на Дирекцијата за заштита и спасување (ДЗС), Стојанче Ангелов, предупреди дека бројот на пожари не опаѓа со почетокот на септември, што постојано ги исцрпува противпожарните екипи на терен. Само во текот на вчерашниот ден биле регистрирани 26 пожари на отворен простор.
Тежок пожар во моментов е активен во Општина Струга, во атарот на селата Локов и Буринец. Таму горат нискостеблеста шума, грмушки и трња, со непосреден ризик огнот да зафати и квалитетна шума. На терен интервенираат екипи на ЈП „Национални шуми“, додека високите дневни температури ја ограничуваат можноста за дејствување со хеликоптер. Покрај струшкиот регион, интервенции има и во околината на Боговиње и Штип.
