Двајца работници на аеродромот во Франкфурт починаа од маларија откако вкупно шестмина вработени се заразија со оваа сериозна тропска болест. Германските здравствени власти соопштија дека заразените комарци најверојатно пристигнале во најфреквентниот германски аеродром со некој од меѓународните летови. Првите случаи на инфекција биле детектирани уште во јули, но исходот стана фатален за двајца од заболените.
Аеродромскиот оператор „Фрапорт“ и Службата за јавно здравје во Франкфурт потврдија дека сите шестмина инфицирани се мажи кои работеле на различни позиции и во различни сектори од аеродромскиот комплекс. На терен веќе се поставени специјални замки за комарци, а фатените единки ќе се анализираат во лабораторија за да се утврди нивниот точен вид и географско потекло.
Германскиот институт за контрола на болести „Роберт Кох“ објасни дека маларијата во Европа речиси исклучиво се регистрира кај патници кои се враќаат од ендемски подрачја, поради што ваквиот локален пренос на аеродромски терен е исклучително редок. Кога пациентот нема историја на патување во егзотични земји, лекарите многу потешко и подоцна се сомневаат на маларија, а секое одложување на терапијата драстично ги зголемува шансите за фатален тек на болеста.
Од здравствените служби во Франкфурт уверуваат дека ризикот за поширокото население останува исклучително низок. Болеста ја предизвикува паразит и таа не може да се пренесува директно од човек на човек, туку единствено преку убод од инфициран женски комарец од родот Anopheles.
Феноменот познат во епидемиологијата како „аеродромска маларија“ не е целосно непознат, но е редок, со последен забележан случај на истиот аеродром во 2023 година. Тој отвора сериозно прашање за контролата и дезинсекцијата на воздухопловите кои доаѓаат од тропските предели каде што болеста е широко распространета.
