Полицијата во Келн истражува инцидент во кој робот висок околу 120 сантиметри наводно допирал малолетна девојка по задникот и изведувал сексуално сугестивни движења, додека двајца млади момчиња го снимале и го пренесувале настанот во живо на социјалните мрежи.

Инцидентот се случил ноќта меѓу 10 и 11 октомври, непосредно пред полноќ, во центарот на Келн, во близина на ресторан за брза храна.

Според германската полиција, 16-годишната девојка стоела со две пријателки на возраст од 17 и 18 години, кога одзади ѝ се приближил робот во црвено-златна боја.

Роботот ја допрел по задникот, по што почнал да изведува движења што имитирале сексуален однос. Двајца млади момчиња, на возраст од 16 и 19 години, наводно го снимале настанот, го коментирале и го пренесувале во живо.

Роботот бил скриен во багажник од автомобил

По пријавата, полициските службеници брзо ги пронашле осомничените во близина на местото на настанот.

Роботот повеќе не бил на улицата. Неговиот 16-годишен сопственик, кој потекнува од германскиот град Вегберг, го ставил во багажникот на автомобил „Фолксваген“.

Полицијата го пронашла и го запленила роботот, заедно со двата мобилни телефона на осомничените.

Кој е одговорен кога робот ќе вознемирува човек?

Германските истражители сега утврдуваат дали роботот бил управуван од далечина или неговите движења биле однапред програмирани.

Истрагата е насочена кон двајцата млади момчиња и нивната можна улога во инцидентот.

Случајот отвора поширока дилема за употребата на роботите во јавниот простор. Иако физичкиот контакт го направила машина, одговорноста може да биде кај лицата што ги контролирале нејзините движења или свесно ја користеле за вознемирување.

Германската полиција продолжува со истрагата, а засега не е утврдено кој конкретно управувал со роботот во моментот на инцидентот.